Ruth bung 4 sungih thupi: Boaz in an nunphung dan in Ruth kha nupi dingah a trhi

Ruth cabu natabiknak thu cu Boaz in Ruth cu nupi dingah a trhi ih, cule fapa Obed an neinak thu a si. Obed cu Jesse ih pa a si ih, Jesse cu siangpahrang David ih pa a si. Naomi ih tawlrel sak vek in Ruth in a tuah then hnu ah Boaz khalin Ruth ih tumtahnak hmuahhmuah kimter dingah thu a tiam (Ruth 3:1-18). Boaz in Ruth hnen ah, “na duhmi hmuahhmuah kalo tuah sak ding (3;11)” tiin, thu tiam a pe, cu’i thu cu, a tlun (Ruth 2-3),comment ah kan ngaan zovek in, Ruth ih tumteh bik mi cu, “Boaz in amah Ruth cu nupi ding ah trhi ding thu” kha a si. Cumicu, Boaz khal in Ruth ih duhmi sut tullo in a thei thiam ih, “na duhmi hmuahhmuah kalo tuah sak ding” tongfang dang in kan sim asile, “nupi ding ah kalo trhi tengteng ding sokhaw”, tiin, thu tiam a pe a si.[1] Boaz in Ruth cu nupi dingah trhi ding in a tiamtuah ko nan veilekhat ah a trhi cih lo, an mah Hebrew nunphung (or) Moses Dan vek in a tuah a si. Cumicu, Ruth chapter 4 sungah ka siar thei.

An khuasung mipawl le khua upa pawl tonkhawmnak ah Boaz in Elimelech ih songkhat pa cu a toter ve. Cule, khua upa le khuasong mipi hmai ah Elimelech ih sungkhat naideuh pa cu, Elimelech ih lao a zuar ih nangmah in na tlan ding maw?” tiin, a sut. Boaz in Elimelech ih sungkhat amah hnakin naideuhpa hnenah hitiih a sutnak sullam cu, Moses Dan ah, “Israel mi pakhatkhat a farah ruangah a leiram a zuar a si ahcun a nai bik a sungkhat in a leikir sal thei ding” (Leviticus 25:25), tiin, a um ruangah a si. Jeremiah ih paseu Shallum ih fapa Hanamel a lao ram zuar a duh ih Moses Dan vek in a tuah; an sungkhat naibik Jeremiah cu a lei ter ve a si (Jeremiah 32:6-7). Boaz in Elimelech ih sungkhat naideuh pa cu, Elimelech ih lao lei ding lawng a simlo ih, Moses Dan ih sungkhat truanvo hmuahhmuah khail lakcih ding in a sim. Boaz ih sim duh mi cu Elimelech ih laoram na lei ding a si ah cun, Elimelech pafa ih nupi Ruth khal na trhi cih a trul ve ding ti duhnak a si. Ziang ruangah tile Moses Dan ih, “sungkhat truanvo” a ti duhnak sullam cu hi tiin a si, “Unau pahnih hmun khatah an um ih pakhat deuh cu fapa pakhat hman nei loin a thih ahcun a nupi cu an sungkhat sung siar lo a lengah pasal a nei thei lo ding; a pasal ih unau pa cun a ṭhit ding a si.” tiin, a um (Danpeksalnak 25:5).Elimelech ih sungkhat pa cun lao lei ding cu a lung kim nan, a thizo mi Elimelech fapa ih nupi Ruth trhi ding cu a duhlo, curuangah, a ke dam cu cu’i lao a tlan duhtu Boaz hnenah a pek (Ruth 4:8). Moses Dan sungah a unau thizotu hrangah truanvo lak in a taanmi a nupi trhi duhlo a si ah cun, cu’i a thizomi nupi in unau truanvo a lak duhlotupa ih kedam kha khua upa hmaiah laksak ding ih, “unau hrangah fa nai duhlotu” tiin, a mualpho ter ding, ti a si (Danpeksalnak 25:9). Elimelech songkhat pa khal in, an Dan ih sungkhat unau hrang truanvo theilo langternak ah a kedam cu Boaz – a ai a rol theitu – kha a kedam a pek ve a si. Ruth 4:7 sungah cun a tlunih Moses dan kan ngaanmi thawn cun a bangawk cekcilo vek in a um, asinan  sullam cu a bangawk tiin kan lak thei, Ruth 4:7 ih sim mi ah tla, “a letu dingin a leilo le – truanvo a neitu in a tuah duhlo le – kedam peawk kha a si ve. Cuticun, Boaz in Ruth cu an mah nunphung dan takin nupi ding ah a trhi (Ruth 4:10).

Ruth bung 4 sung thu hi Hebrew nunphung (or) Moses Dan in nupi trhi awknak thu a si. Boaz in Ruth a trhi tikah anmah nunphung dan kimten in a tuah thluk. Hitiih Ruth cabu sungih nunphung thu thupi zet in a tarlang mi sullam hi ziang a si ti thei fiang a har zet. Cabu kan siar tik ah a ngaantu ih tumteah mi thei ding hi a siartu hrang ah a thupi bik mi le a sifawn. a tang ih ngaanmi ah kan zohbet vivo pei.

An khuasung mipawl in Ruth cu fate tampi nai seh tiin thlawsuah a pek (Ruth 4:11). An khuasung mi pawl ih thlawsuah a pek tikih a tongmi tongfang kan zoh asile, “Judah le Tamar fapa Perez te’i innsang vek in hi nunaunu (Ruth) sungin Bawipa ih a lo pek ding mi fate pawl cu na innsang mawiter tu ah cang seh” tiin, thawsuah an pe (Ruth 4:12). Ruth cabu ngaantu in khuasung mipawl ih Boaz le Ruth thlawsuah a peh tik ah ziang ruangah, “Judah cithlah a telh kherkher” ti hi, kan theilo.

Ruth cabu tumtahnak kan kan tarlang zo vek in, Pathian thu fehdan thawn kan ruat asile;

• 1) a ram, a miphun, a nunphung, le a biaknak pawl taan thluh ih a nung Pathian biatu ram ah feh tahartin, “cu’i miphun le nunphung cu ka miphun le ka nunphun  a si” tiin a lut awtu Ruth ih zumnak hi thupi zet in a tar lang ih.
• 2) Ruth vek ih an sinak hmuahhmuah taan ih a nung Pathian biatu miphun ah a lut tu pawl hmuahhmuah cu Pathian ih hril mi a silo khalle Pathian in a hnong cuanglo, tihi Ruth cabu ah thipi zet in a tarlang fawn.
• 3) Cule Ruth cabu in, Judah le Tamar ih sin siangpahrang David suahkehnak cithlah thu khal thupi zet in a tarlang, tiin tla ruah thaih a si.

Ruth cabu tumtahnak pathum kan relmi sungah, netabik a pathum (3) nak ih hmuhdan kha Ruth cabu commentary ngaantu tam sawn khalin a rel tel. Ruth cabu sungih thu a zate ka zoh asikhalle, a tlun ih pathun cu a huap thluh ih, natabi chapter 3 le 4 cu Hebrew nunphung (or) Moses Dan in nupi naiawknak thu a si ih, a cabu ih tumtahnak pathum kan rel zo mi sungah a pathum (3) nak hmuhdan thawn a nai awkbik tiin ruah theih a si.

[1] Himi thu hi a tlun, Ruth chapter 3 comment ah siar bet aw.