1 Samuel 1-10 sungih thupi: Israel mipawl anmah ih tha an ti dandan in khua an khang / an nung.

Israel mipawl hi uktu le hruaitu tha neilo in an tlang leng lai ah, Pathian in Hanah zumnak hmang in hruitu tha Samuel a hril. Sikhalsela, Israel mipawl in anmah ih tha an ti dandan in khua an khang;

• (1) Puithiam Eli ih fa le pawl in puithiam sinak an duhduh (အလွဲသုံးစား) in an hmang  
• (2) Filistin mipawl in an neh tik ah Thukhamkuang cu an duhduh in an ret
• (3) Pathian in hril sakmi hruaitu tha Samuel a um hrih ko, Pathian in anmah hruaitu ding ah ziang tin a tuah sak laiding ti tlan hngaklo in an duhduh in siangpahrang an dil.

Thu hmaihruai

Samuel cabu pakhatnak sungah Epharaim ram, Ramah khua ih umtu Elkannah le a innsang (a nupi pahnih, Hannah le Peninnah), thu in a thok. Elkanah heh Epharaim ram songah umtu Levi miphun i (1 Sansiarhnakte 6:33-35). [1] Sikhalsela himi cabu sungih thu hi, “ziangtik caan hrawng ih um mi a si” ti hi, Bible sungah fiah zet in a ngaanlo. Bible thiam Davis le Whitcomb cun, Samuel cabu pakhatnak, a thoknak thu pawl hi Thuthentu cabu sungih Samson san hrawng ah thok mi a si ding” tiin, ruahnak an nei. Cutiih an ruahsannak cu Judah siangpahrang Solomon thih kum BC 931/30 kum ihsin an zoh vivo nak ih sin a thok ih Samson san hrawng ah ummi thu tiin an hmusuak.[2] Cutiin, Samuel cabu pakhatnak hi Thuthentu pawl san, Samson san hrawng ihsin rak umzo mi thu a si ah cun, Israel mipawl hi uktu neilo, hruaitu tha neilo, (မင်းမဲ့၊ အုပ်ချုပ်သူမဲ့ တိုင်း ပြည် sungih မိမဆုံးမ ဖမဆုံးမ) vekih an tlang leng caan hrawng a si. Hemi thu cu, Thukhantute 17-21 comment ngaan mi sungah siar bet aw).

Samuel cabu pakhatnak chapter 1-10 sung ih ngaanmi thu pawl kan zoh thuuk deuh asile Israel pawl hi uktu thitha neilo, hruaitu thitha neilo vek in an tlangleng tlang tiin, sim theih a si. Elkanah le a innsang; a nupi pahnih, Hannah le Peninnah rem awlo thu, hmuhsuam awk thu in a thok (1Samuel 1:1-8). Hanah in fa a nei thielo ruangah Peninnah in a zawmtai theu (1Samuel 1:6). Curuangah Hanah in Pathian hnenah fa nei theinak ding ah thla a cam theu, Pathian khal in Hanah ih thlacam cu a ngai sak ih fapa Samuel a pe (1Smauel 1:19-20). Cumi tikcuu hrawngah Eli cu puithiam a truan (1 Samuel 1:10). Eli ih fapapawl cu puithiam an sinak kha an hmangsual (အလွဲသုံးစား), curuangah Pathian in Eli innsang parah a thinheng (1 Samuel 2:29-30).

Cule, Filistin mipawl in Israel mipawl cu an do ciamco ih Israel mi tampi an nunnak an liam (1 Samuel 4:2). Israel mipawl in an mah ruahnak ih tha anti dandan in Bawipa’i Thukhamkuang cu an thiar. Cu’i Thukhamkuang cu netabik ah Filistin mipawl in an lak sak (1 Samuel 4:11). Bawipa’i Thukhamkuang Filistine mipawl hnenah a um sung ah Pathian in Filistine mipawl cu harsatnak a thlengter ciaco. Curuangah, Filistine mipawl in cu’i Thukhamkuang cu Israel mi hnenah an kuatkir sal (1 Samuel 6:1-3).

Cu’i san ah, Israel mipawl thubuai an nei asile, Samuel in thu a thensak theu, cuticun, Israel mipawl cu a kilkhaw theu (1 Samuel 7:15). Samuel a tar tlang tikah Israel mipawl in, Samuel hnenah hruaitu ding siangpahrang an dil. Curuangah, Pathian Kish ih fapa, Saul cu Israel uktu siangpahrang ding a hril. Cuticun, Saul cu Israel siangpahrang hmaisabik a cang ta.

1 Samuel 1-10 thupi pawl:

• 1) Elkannah le a innsang buainak (1:1-8).
• 2) Samuel suahkehnak thu (1:9-2:26)
• 3) Eli le a innsang a hnong ih, Samuel a hril (2:27-3:21)
• 4) Uktu nailo Israel mipawl le puithiam Eli le a fapa pahnih thihnak (4)
• 5) Bawipa’i Thukhamkuang cu Filistin mipawl in an lak (5)
• 6) Filistin mipawl in Thukhamkuang cu Israel mipawl hnen ah an kuat kir sal (6-7)
• 7) Israel mipawl in siangpahrang an dil ih, Saul cu an siangpahrang ding ah a hril sak (8-10).

[1] Leon Wood, A Survey of Israel’s History, (Zondervan, 1971), 230.

[2] John J. Davis and John C. Whitcomb, A Commentary on Joshua to 2 Kings: From Conquest To Exile, (Baker Publishing House, 1989), 176-77.