Thupi: A thutiam kimtertu Pathian
Ngaantu: Henry T Conzo
Date: 30^th December 2023

Thu hmaihruai

Israel mipawl Egypt ram ih harsat an tuarnak ihsin runsuak ih, Canaan ram ah feh pi ding ah Pathian in thu a tiam (Exo. 3:7-10), ih a mah Pathian an hmai ah in feh tahrat in cu’i Canaan mipawl dawi dingah Moses hnenah thu a tiam dah (Exo. 23:20-33). Cuticun, Pathian in a hmang ih Israel mipawl cu Egypt ram ihsin a ruun suak dah. Moses hruaimi Israel mipawl cu Pathian thutiam ram – Canaan ram – an feh ih nelrawn ah kum 40 an rei dah (Numbers 14:34). Israel mipawl nelrawn ih kum 40 tluk an rei hnu (or) Moses thih hnu ah, Pathian in Israel mipaw hruaitu dingah Joshua a hril (Joshua 1:2). Israel mipawl cu Joshua kaihhruainak in Pathian thutiam ram – Canaan ram – cu an lut thok. Cumi thupawl cu Joshua cabu 1-5 sungah kan siar thei. Joshua le Israel mipawl cu Jordan tiipi an tan ih Canaan ram an lut thok tikah, ral an do hlan hmaisabik ah Bawipa’i ralkap Joshua hnen ah a lang (Joshua 5:13-15). Joshua cabu ngaantu in, “ziang tumtak in a ngaan, ziang ruangah Bawipa’i ralkap Joshua hnenah a lang,” tihi, fiang zet in a ngaan tel lo. Cangaan tuih tumtaknak thu felfai tein kan thei fianglo nan hlir dan phun hnih in kan ruat thei, cumi hlirdan phunhnih cu a tanglam ah kan ngaan tum ding.

Bawipa ih vancungmi silo in Bawipa ih ralkap

Jericho khuapi kiang ih Bawipa’i ralkap le Joshua an tongawnak thu hi a danglam zet ih, Israel mipawl Canaan ram an lut thoknak thu, Joshua 1:1 – 5:12 sungih thupawl thawn an pehparawk tuklo vek in a um. Cu’i hleiah, a tumtahnak le a sullam le ngaan fiang in a um fawnlo. Cangaantu ih hmanmi tongfang pawl kan zoh a si le; NIV Bible ah, “The commander of the LORD” ti le, NASB ah, “The captain of the LORD,” tiin, an ngaan ih, Saya Hrekio lehmi Falam Bible ah, “Bawipa ih ralkap” tiin, a ngaan (Joshua 5:14). Bible hlun thuanthu kan zoh tikah Pathian in leitlun ih um aminung pawl hnenih thu a sim duh tikah, amah Bawipa a lar asilole a vancungmi thlah in maw thu a sim theu. Thuthemnakah; vancungmi a lar (Gen. 16:7-8; 19:15; 22;11 – Bible bubfcaang kan ngaan tel thluh asile a tamtuk ding). Sikhalsehla, Joshua hnenah cun, Bawipa ih vancungmi thlah a silo ih, Bawipa ih ralkap sawn a thlah. Cutiih Bawipa ih ralkap kherkher a thlahnak sullam cu thupi in ruah tha a si.

Pathian in a thutiam kimternak ah Joshua hnenah a larawk ter

Joshua hnen ah Bawipa ih vancungmi a lar khi, amah Pathian ih thutiam a kimter mi asi ih cumi cu phunhnih in kan hlir thei. (i) Thlirdan pakhai nak ah, Moses hnen ih a tiam dah mi, “nan hmaiah keimah ka feh ding ih, Canaan miphun pawl cu ka dawithluk ding” (Exo. 23:20-33), tiih, thu a tiam dahmi a kimter nak a si, tiin, ruah theih a si. (ii) Hlirdan pahnihnak ah, Joshua hnen ah Pathian in, “Moses hnenih ka umpi dahzo vekin nangmah hnen khalah kalo umpi ve ding, cak zet le ral tha zet in um aw” (Joshua 1:5, 6, 7, 9) tiin, Joshua hnen ih thu a tiam dah mi a kim ter a si, tiin, Joshua hnen ih Bawipa ih ralkap larnak thu cu phun hnih in kan thlir thei. Cumi thlirdan phunhnih cu a tanglam ah kan ngaanbet ding.

• (1) Pakhatnak ah, Pathian in Israel mipawl Canaan ram an lut zik ah, “Moses hnenih ka umdahzo vek in na hnenah kalo umpi ve ding, cakzet le raltha zet in um aw” (Joshua 1.5, 6, 7, 9)” tiih, Joshua hnenah thu a tiam dahmi cu, Joshua in cu’i a tongkom parah rinsan ngamnak dingah thapek nak in Pathian amah cu, ralkap vek in Jushua hnenah a langaw, ti thei a si. Joshua raldonak thuanthu kan zoh asile, Pathian ih tiammi ram – Canaan ram – hi, zohman umdahlo mi ram, ram lawng a silo ih, ram neitu, luahtu neimi ram pawl an si. Israel mipawl ih do dingmi ral khi tifingriat kap ih ummi vunnel zat an si (Joshua 11:4). Cumi vunnel zat a tammi ral do dingah Joshua le Israel mipawl ih an trulbik mi cu raltha mi ralkap a si. Prophet Elisha Dothan khua ah a um lai ah, Syria ralkap pawl in an umnak khua cu an kulh thluh kha Elisha hnen-umpa in a hmu tikah a tih ngaingai. Sikhalsehla, Elisha in, Pathian hnenah, “ka hnen-umpa ih mit vangter awla, khua hmuter aw,” tiin, thla a cam sak tikah, cu’i a hnen-umpa cu a mit a vang ih, an kiangkap hmuahhmuah ah rang le meisa rangleng khat thepthep kha a hmu. (2 King 6:16-17). Pathian in, minung mitih hmu theilo a cahnak in, minung mit ih hmuh theimi ral tampi do ding ah, minung mit ih hmuh thei mi Joshua le Israel miphun  hmang. Pathian hmanruah Joshua le Israel mipawl in, amah Pathian rinsan ngam ding ah, thu a sim, thazang a pek, a zirh. Joshua le Israel mipawl khal in tifingriat kap ih vunnel zah tam (Joshua 11:4), Canaan mipawl cu Pathian rinsan in le ral tha zet in an do ih an neh.

• (2) Hlirdan pahnihnak. Israel mipawl nelrawn ih an umlai ah, Pathian in Moses hnenah Canaan ram feh ding in thu a sim. Cule, amah Pathian kha an mah Israel mipawl hmai ah feh sung ding ih, cu’i ram – Canaan ram – ih umtu pawl dawihlo thluh ding in thu a tiam dah (Exo. 23:20-33). Joshua le Israel mipawl Pathian tiamkamnak ram – Canaan ram – an lut thlang tik ah, Pathian in Moses hnenih thu a tiam dahmi kimter nak ah, “Pathian amah rori in, Israel ralkap hmang tahratin cu’i Canaan mipawl cu a do ding” ti, langternak ah, Israel ralkap hruaitu Joshua hnenah a lang awter a si (Joshua 5:13-15), tiin, ruah thaih a si. Joshua hruaimi Israel ralkap pawl in Canaan mipawl an do dan pawl kan zoh asile, laitlun ralkap pawl ih ral do dan asilo ih, Pathian thupe thlunnak in ral an neh. Thuthimnak ah: (i) Jericho khuapi an do dan စစ်နည်းဗျူဟာ kan ruat asile, Pathian thupek စစ်နည်းဗျူဟာ in an do ih ral an neh. (ii) Pathian rilmi Joshua ih thupek an thlunlo ruangah Ai khuapi an do tikah ral an nehlo. Sikhalsela, Pathian fial vek in an do tikah ral an neh. (iii) Israel miphun ting ruk (601730) hrawng in (Numbers 26:51), tifingriat vunnel zat ih tam ralpawl cu (Joshua 11:4), an do ih an neh.

Pathian in Joshua hnenah Canaan ram zemawk dingin thu a peh tikah, an do hrihlo mi khuapawl khal a tel cih.  Cu’i lak hrihlo, do hrihlo mi khuapawl cu, Pathian amah rori in a do leh ding ih lak leh dingah thu a tiam dah (Joshua 13:1-6). Pathian in ama’i thu tiam vek in Joshua nung lai ih an lak hrihlo mi khua pawl cu Israel mipawl in Pathian bawmnak in an lak sal (Thuthentu 1:1-27). Sikhalsehla, Israel mipawl in Pathian thupek vekin Canaan mipawl cu an dawi thluhlo (Judges 1.27-36). Israel mipawl in Canaan mipawl an dawi thluhlonak thu cu, Thuthentu cabu thawn zir leh ding a si.

Netabiknak

Jericho kkhuapi kiang ah Joshua le Bawipa ih ralkap tongawnak thu hi, Joshua cabu ngaantu in a tumtahnak le a sullam fiang zet in a ngaanlo. Sikhalsehla, Pathian thu umdan le Pathian thu fehdan in kan thlir asile, Pathian in Moses le Joshua hnen ah a tiam dahmi thupawl kimter nak a si, tiin, ruah theih a si.

Israel mipawl nelrawn ih an um laiah Pathian in Moses hnenah, “nan hmaiah ka feh ding ih Canaan ram ih umtu pawl ka dawi thluh ding” (Exo. 23:20-33) tiih, a tiam dahmi a kimter a si. Cutiih Moses hnenih a tiam dahmi cu Joshua hmangin hmalaknak a thok thlang ding ruang ah, Joshua hnenkhalah, “Moses hnenih kaumpi dah vek in nangman hnen khal ah kalo umpi duing, tihhlah, raltha in umaw” tiin, thu a tiam dah (Joshua 1.5, 6, 7, 9). Cutiih, Joshua hnenih a tiam mi thu kimter nak ah Canaan mi an do hlanah Pathian amah rori ralkap vek in Joshua hnenah a lar, tiin, ruah theih a si.

Joshua in Pathian a rinsan ih a thupek tha te in a thlun (Joshua 24:15). Culawng siloin a hruaimi Israel mipawl tla Pathian lawng rinsan ding ah napi in a forh (Joshua 23:1-14:28). Joshua hruaimi Israel ralkap pawlin tifingriat vunnel zat ral pawl cu an neh (Joshua 11:4). Kan biakmi kan Pathian cu, a thutiam vekin tuah theu tu Pathian, a thutiam vek ih tuahtheitu Pathian a si. In kotu Pathian cu rinsan tlak Pathian a si ih, kan hrangah thatnak tuah dingin a tiam mi thu cu a tuah tengteng ding a si (1Thessalon 5:24). Curuangah, zumtu nang le kei ih kan truanvo cu; Pathian thupek zum in, Pathian rinsan in, Pathian thawn pehtlaihnak thuukzet nei ringring ih nung ding hi, kan neihmi truanvo tumbik a si.

A siartu nan zate parah Patian in thlawsuah a lopek sinsin seh.
Lungawi,
Henry Thawngukthang Conzo